Алдағы төрт жылда Қазақстан 5 мың шақырым жаңа теміржол салады
2035 жылға қарай транзит көлемін жылына 100 млн тоннаға жеткізу көзделіп отыр
Астанада ұйымның 70 жылдығына орай өткен Теміржолдардың бас директорлары конференциясының 40-отырысында жүк тасымалын арттыру, инфрақұрылымды жаңғырту, қағазсыз технологияларға көшу, интеллектуалды басқару жүйелерін енгізу және кадр даярлау мәселелері талқыланды, деп хабарлайды primeminister.kz.
«Қазақстанның теміржол саласы экономикалық дамуда маңызды рөл атқара отырып, халықтың өмір сапасын арттыруға және тұрақты өсімге бағытталған. Ұйымның 70 жылдығына арналған бұл кездесу Еуразияның қақ ортасында, ұлы жолдардың торабында өтіп жатқаны символдық мәнге ие. Заманауи әрі тиімді көлік жүйесі бізге жаһандық экономикаға интеграциялануға, халықаралық жеткізу тізбектеріне қосылуға мүмкіндік береді», — деді Қазақстан премьер-министрі Олжас Бектенов.
Негізгі назар Қазақстанның транзиттік әлеуетін одан әрі арттыруға аударылды.
«Біздің ортақ мақсатымыз – Еуразияны біртұтас, «тігіссіз» жұмыс істейтін көлік жүйесіне айналдыру. Қазақстан – мұхитқа тікелей шығатын жолы жоқ әлемдегі ең ірі мемлекет. Бірақ біз осы географиялық шектеуді стратегиялық артықшылыққа айналдыруға жұмыс істеп жатырмыз. Соңғы 15 жылда көлік саласына шамамен 35 млрд доллар инвестиция салынды. 2500 шақырымнан астам жаңа магистральдық теміржол салынды. Бүгінде Қазақстан арқылы «Батыс Еуропа – Батыс Қытай» бағыты бойынша құрлықтағы транзиттің шамамен 85%-ы өтеді. Біз қол жеткізген нәтижемен тоқтамаймыз. Алдағы 4 жылда тағы 5 мың шақырым жаңа теміржол салуды жоспарлап отырмыз. Біздің мақсатымыз – 2035 жылға қарай транзит көлемін жылына 100 млн тоннаға жеткізу», – деді премьер-министр.
Басты бағыттардың бірі ретінде Транскаспий халықаралық көлік бағытын (Орта дәліз) дамыту аталды. Бұл бағыт аясында теміржол және порт инфрақұрылымы жаңғыртылып жатыр. Атап айтқанда, Ақтау мен Құрық порттарының контейнерлік қуаттары халықаралық серіктестердің қатысуымен кеңейтілуде. 2029 жылға дейін жүк тасымалы көлемін 80 мыңнан 300 мың ДФЭ-ге дейін арттыру жоспарланған. Жүк жеткізу уақыты 18 күнге дейін қысқартылып отыр, ал болашақта 10 күнге дейін төмендету көзделуде.
Сондай-ақ «Солтүстік – Оңтүстік» халықаралық көлік дәлізі дамытылуда. Бұл бағыт Парсы шығанағы мен Үндістан нарықтарына ең қысқа жолмен шығуға мүмкіндік береді.
Мемлекеттің басым бағыттарының бірі – саланы цифрландыру.
«Цифрлық технологияларды дамытуға ерекше мән беріп, 2026 жыл президентіміздің бастамасымен Цифрландыру және жасанды интеллект жылы деп жарияланды. Біз TezCustoms платформасын енгіздік, ол Қытаймен шекарада рәсімдеу уақытын 8 сағаттан 30 минутқа дейін қысқартуға мүмкіндік берді. Бұл жұмыс басқа елдермен де жалғасып жатыр», – деді премьер-министр. Ол сондай-ақ ұйым қатысушыларын теміржол желілерінің өткізу қабілетін арттыру үшін заманауи цифрлық шешімдерді белсенді қолдануға шақырды.
Форумға әлемнің 30-дан астам елінен 300-ден астам теміржол басшылары мен тасымалдау компанияларының өкілдері қатысты. Ұйым 320 мың шақырымнан астам теміржол желісін біріктіреді, ол арқылы жыл сайын шамамен 5,5 млрд жолаушы және 5 млрд тоннаға жуық жүк тасымалданады.
Айта кетейік, бұған дейін Бақты – Аягөз теміржолының құрылысы 2027 жылдың соңына дейін аяқталатыны хабарланған еді. Жолдың жалпы ұзындығы 303 шақырымды құрайды. Қытай бағытына тартылатын бұл желінің құрылысы Абай облысында 2023 жылы басталған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
