Ақмола облысында астықты терең өңдейтін зауыт салынады
Жобаға 300 млрд теңге инвестиция салынып, кәсіпорын жылына 6 млн тоннаға дейін өнім өндіреді
Қазақстан үкіметі ауыл шаруашылығы министрлігі мен «Азия Алтын Дән» ЖШС арасындағы Ақмола облысында астықты терең өңдеу зауытын салу жөніндегі инвестициялық келісімді бекітті, деп хабарлайды primeminister.kz.
Заманауи жоғары технологиялы кәсіпорын Aqmola индустриялық аймағында 500 гектар аумақта салынып жатыр. Ол агроөнеркәсіптік кешеннің өңдеу секторындағы ең ірі нысандардың біріне айналмақ. Жобаның басты ерекшелігі – оның ауқымы және астықты биотехнологиялық, қалдықсыз өңдеуге бағытталуы.
Жобаның жалпы инвестиция көлемі 300 млрд теңгені құрайды, ал өндірістік қуаты жылына 6 млн тоннаға дейін жетеді.
Күтілетін экономикалық әсері кешенді болады. Жоба астықты толық циклде өңдеуді көздейді және жоғары қосылған құнды өнімдер шығарады: ұн-жарма өнімдерінен бастап ауыл шаруашылығы жануарларына арналған дайын жем-шөпке дейін. Оның іске асуы экспорт құрылымын әртараптандыруға, жергілікті шикізатты пайдалану деңгейін арттыруға және елдің импортқа тәуелділігін айтарлықтай төмендетуге мүмкіндік береді.
Кәсіпорында шамамен 800 жаңа жұмыс орны ашылады. Келісім аясында инвестор биоинженерия саласындағы білікті техникалық мамандарды даярлауды да міндетіне алады – жыл сайын 40 адамға дейін. Дайындық үздіксіз оқыту жүйесі арқылы, соның ішінде шетелдік тағылымдамалар мен халықаралық алмасуларды қамти отырып жүзеге асырылады.
Зауыт базасында заманауи зерттеу және технологиялық зертхана құру жоспарланған. Сонымен қатар инвестор индустриялық аймақтың сыртқы инженерлік-коммуникациялық инфрақұрылымын дамытуға қаржы бағыттайды.
Перспективада кәсіпорын іске қосылғаннан кейін Астана – Қарағанды автомагистралі бойында көлік айрығы бар жол өткелін салу, сондай-ақ магистральдық теміржол арқылы индустриялық аймаққа апаратын автожол салу қарастырылған.
Инвестор өңірдің әлеуметтік инфрақұрылымын дамытуға да белсенді қатыспақ. Жоба толық іске қосылғаннан кейін жыл сайын білім беру, мәдениет, бұқаралық спорт, жастар саясаты және денсаулық сақтау салаларындағы әлеуметтік бастамаларға қаржы бөлінеді.
Сонымен қатар зауыт іске қосылғаннан кейін екі жыл ішінде көпфункционалды спорт-сауықтыру кешені салынады. Оның құрамында бассейн мен жекпе-жек түрлеріне арналған залдар болады. Бұл кешен жалпы халық үшін ашық болмақ.
Еске салайық, 2025 жылдың соңында Алматы облысында дәнді және майлы дақылдарды терең өңдеуге маманданған «Қапшағай Бидай Өнімдері» агрокешені іске қосылған еді. Сондай-ақ Қостанай облысында да астықты терең өңдеу кешенін салу жоспарланған. Астанада дәнді және бұршақ дақылдарын терең өңдейтін агроөнеркәсіптік кешеннің құрылысы басталды. Бұдан бөлек, Ауыл шаруашылығы вице-министрі Ермек Кенжеханұлы Henan Agriculture Investment Group делегациясымен кездесіп, астықты терең өңдеу зауытын салу, жылына 100 мың тоннаға дейін өнім өндіретін қант зауытын іске қосу және құс фабрикасын ашу мәселелерін талқылады. Fufeng Group-пен жүгеріні терең өңдеу жобасы бойынша келісім жасалды. Dalian Hesheng Holdings Ақмола облысында астықты терең өңдеу кешенін салуға 650 млн доллар инвестиция салмақ.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
