Мобильді аударымдар бойынша хабарламалар мамыр айында жіберіле бастайды
Салық органдары банктерден деректерді алып, оларды талдауға кірісті
Қаржы вице-министрі Ержан Біржанов Мәжіліс кулуарында қазақстандықтардың мобильді аударымдарын талдау жұмысы деректерді өңдеу кезеңіне өткенін, ал алғашқы хабарламалар азаматтарға мамыр айынан бастап жіберілетінін айтты, деп хабарлайды Kapital.kz іскерлік ақпарат орталығының тілшісі.
Оның айтуынша, қазіргі таңда елдегі барлық банктер жеке тұлғалардың мобильді аударымдары бойынша қажетті мәліметтерді ұсынған. Қазір мемлекеттік органдар оларды жүйелеп, азаматтардың салықтық мәртебесін анықтау үшін тексеріп жатыр.
«Біз бұл ақпаратты алдық. Қазір деректерді өңдеу жүріп жатыр. Хабарламаларды тек мамыр айында жібереміз, өйткені бұл мәліметтерді талдап, санаттар бойынша салыстыру қажет: жеке кәсіпкер ме, әлде өзін-өзі жұмыспен қамтыған ба, резидент емес пе немесе басқа санат па. Барлығын қараймыз... Мамыр айында хабарламалар жібере бастаймыз», – деді ол.
Бұған дейін Ержан Біржанов 2026 жылғы 1 қаңтардан бастап банктер қандай жағдайда қазақстандықтардың шоттарындағы қаражат қозғалысы туралы мәліметтерді салық органдарына беретінін түсіндірген болатын.
2025 жылғы 11 желтоқсанда Қаржы министрлігі белгілі бір шектік соманы бекітті. Сол шектен асқан жағдайда банктер 2026 жылғы 1 қаңтардан бастап шоттардағы қаражат қозғалысы туралы деректерді салық органдарына жолдайды. Ал 2025 жылдан бастап Қазақстан банктері 2024 жылдың қорытындысы бойынша жеке кәсіпкерлердің, заңды тұлға басшыларының және олардың жұбайларының мобильді аударымдары туралы ақпаратты Мемлекеттік кірістер комитетіне ұсына бастады.
Мобильді аударымдарды бақылау заңсыз кәсіпкерлікпен айналысып жүрген, салықты толық төлемейтін немесе мүлде төлемейтін тұлғаларды көлеңкеден шығаруға бағытталған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
