• Басты бет
• Экономика
• Қазақстан «Дружба» арқылы мұнай транзитінің тоқтатылғаны туралы РФ-тан ресми хабар алған жоқ

Қазақстан «Дружба» арқылы мұнай транзитінің тоқтатылғаны туралы РФ-тан ресми хабар алған жоқ

Бейресми мәліметтерге қарағанда, ақпарат рас болуы мүмкін

Қазақстан Ресейден «Дружба» мұнай құбыры арқылы Германияға қазақстандық мұнай транзитін тоқтату туралы ресми хабарлама алған жоқ, деп мәлімдеді энергетика министрі Ерлан Ақкенженов, деп жазады Интерфакс-Қазақстан.

«Бұл ақпаратты бейресми дереккөздерден алдым. Ресей тарапынан ресми мәлімдеме болған жоқ», — деді Ерлан Ақкенженов сәрсенбі күні Астанада журналистерге.

Министрдің айтуынша, бейресми мәліметтер бұл ақпараттың шындыққа сәйкес келетінін көрсетеді.

Ол сондай-ақ бейресми деректер бойынша Ресей тарапы «Дружба» құбыры арқылы Германияға қазақстандық мұнай айдауға техникалық мүмкіндік жоқ екенін айтып отырғанын жеткізді. Оның пікірінше, бұл жағдай Ресей инфрақұрылымына жасалған соңғы соққылармен байланысты болуы мүмкін.

Reuters агенттігінің мәліметінше, Ресей 1 мамырдан бастап «Дружба» мұнай құбыры арқылы Германияға қазақстандық мұнай жеткізуді тоқтатуы мүмкін.

Бұған дейін хабарланғандай, Қазақстан 2026 жылдың бірінші тоқсанында Германияға мұнай жеткізуді екі есеге арттырып, 730 мың тоннаға жеткізді. 2025 жылы Германияға (Шведт қаласындағы МӨЗ-ге) қазақстандық мұнай жеткізу көлемі 2,1 млн тоннаны құраған. Қазақстан 2023 жылдан бері «Транснефть» магистральдық мұнай құбырлары жүйесі арқылы «Адамова застава» тапсыру пункті бағытымен мұнай жеткізіп келеді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз