• Басты бет
• Экономика
• Қазақстан мен Моңғолия елдерді жаңа автомагистральмен байланыстыруды жоспарлап отыр

Қазақстан мен Моңғолия елдерді жаңа автомагистральмен байланыстыруды жоспарлап отыр

Жобаны пысықтау үшін бірлескен үкіметаралық жұмыс тобы құрылады

Президент Қасым-Жомарт Тоқаев Қазақстан мен Моңғолия транзиттік-көлік саласындағы ынтымақтастықты, соның ішінде екі ел арасында тікелей қатынас ашу мәселесін пысықтауды дамытуға ниетті екенін айтты, деп хабарлайды Ақорда баспасөз қызметі.

«Біз мемлекеттерімізді байланыстыратын автомагистраль салу қажеттігі жөнінде ортақ пікірге келдік. Әрине, бұл жан-жақты талдау мен мұқият зерттеуді қажет ететін күрделі жоба. Ең бастысы — ортақ мақсатқа ұмтыламыз. Сондықтан моңғолиялық әріптесіммен алдын ала кезеңде бірлескен үкіметаралық жұмыс тобын құру туралы уағдаластыққа қол жеткіздік. Бұл топқа барлық күрделі мәселелерді кешенді қарау, көршілес мемлекеттермен келіссөздерді үйлестіру және жобаның іске асу мерзімдерін бақылау міндеті жүктеледі. Болашақта Қазақстан – Моңғолия автомагистралінің іске қосылуы сауда қатынастарына қуатты серпін беріп, оның транзиттік әлеуеті көрші елдерге де елеулі пайда әкеледі», – деді Қасым-Жомарт Тоқаев.

Бұған дейін Ақорда баспасөз қызметі 20-23 сәуір аралығында Қасым-Жомарт Тоқаевтың шақыруымен Моңғолия президенті Ухнаагийн Хүрэлсүх Қазақстанға мемлекеттік сапармен келетінін хабарлаған болатын.

Шағын құрамдағы келіссөздер барысында Қасым-Жомарт Тоқаев Ухнаагийн Хүрэлсүхтің сапары екі ел арасындағы достық қатынастарды дамытуға жаңа серпін беретініне сенім білдірді. Кейін Қазақстан және Моңғолия президенттерінің келіссөздері ресми делегациялар мүшелерінің қатысуымен кеңейтілген құрамда жалғасты. Тараптар ынтымақтастық туралы 13 келісімге қол қойып, тауар айналымын 500 млн долларға жеткізуге келісті.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз