Ресей Қазақстанға АЭС құрылысына 85% несие береді
Қалған 15%-ын Қазақстан Үкіметі қаржыландырады
Ресей Қазақстанда атом электр станциясын (АЭС) салуға арналған қаражаттың 85%-ын мемлекетаралық несие түрінде береді, ал қалған 15%-ын Қазақстан Үкіметі өз есебінен жабады, деп хабарлады Атом энергиясы жөніндегі агенттік төрағасы Алмасадам Сәтқалиев, деп жазады Интерфакс-Қазақстан.
«Қаржыландыру бойынша мәселе болмайды. Белгілі бір формула айқындалды, соған сәйкес Ресей Федерациясы Қазақстан Республикасының Үкіметіне мемлекетаралық несие береді», — деді Алмасадам Сәтқалиев сейсенбі күні Астанада журналистерге.
Ол қазіргі уақытта тиісті үкіметаралық келісімдер пысықталып жатқанын атап өтті.
«Бұл мемлекетаралық несие болады. Қазір екі үкіметаралық келісім дайындалуда: бірі — атом станциясын салу туралы, екіншісі — Ресей тарапынан қаржыландыру беру туралы. Қаржыландыру Ресей Федерациясы тарапынан қарастырылып отыр, онда 85% несие түрінде, ал 15% — Қазақстан Үкіметі есебінен», — деді ол.
Агенттік басшысы «Росатом» қатысуымен АЭС құрылысының алдын ала құны шамамен 15 млрд долларды құрайтынын, қуаты 1200 МВт болатын екі энергоблок жоспарланғанын еске салды.
Бұған дейін АЭС-тер Қазақстанның батысында, Курчатовта және Қостанайда салынуы мүмкін екені хабарланған.
2026 жылғы 17 сәуірде Президент Қазақстан Республикасының атом саласын 2050 жылға дейін дамыту стратегиясын бекітті. Стратегияны іске асыру аясында 2050 жылға қарай Қазақстанда кемінде үш АЭС жұмыс істеуі көзделген. Сондай-ақ төртінші станция салу жобасы қарастырылған. Шағын модульдік реакторлар (ШМР) негізінде АЭС салу нұсқалары да қаралады.
2026 жылғы 2 ақпанда Премьер-министр Олжас Бектенов 2026 жылғы 26 қаңтардағы №40 Үкімет қаулысына қол қойды, оған сәйкес екінші АЭС салу жоспарланған. Станция Алматы облысы Жамбыл ауданында орналасады. Екінші АЭС-тің жұмыс атауы — «Мойынқұм».
Қытайдың CNNC компаниясы Қазақстанда тағы бір АЭС салу жөніндегі консорциумның жетекшісі болуы мүмкін.
2025 жылғы 8 тамызда Алматы облысы Үлкен ауылында АЭС құрылысы жобасы бойынша алғашқы жұмыстар — инженерлік ізденістер басталды. «Росатом» бірінші АЭС жобасы бойынша халықаралық консорциумның жетекшісі ретінде белгіленді. Бірінші АЭС атауы — «Балқаш».
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
