Инвестициялардың ең ықтимал жеті толқыны
ЕАДБ сарапшылары биотехнология, робототехника, виртуалды шындық және ғарыш экономикасы сияқты салаларды ерекше атап отыр
Еуразиялық даму банкі «Инвестициялық мегахайп толқындары. Цифрландыру, ESG, ЖИ: келесісі қайсы?» атты талдамалық баяндамасын ұсынды. Құжат алдағы екі онжылдықтағы қазіргі технологиялық инвестициялық бумдар мен ықтимал жаңа бағыттарға арналған. Баяндамада мұндай толқындар көбіне жаңа салалардың пайда болуы мен дамуының драйверіне айналатыны атап өтілген. 2021 жылғы цифрландыруға, 2023 жылғы ESG күн тәртібіне және 2025 жылғы жасанды интеллектке қызығушылықтың артуынан кейін келесі ықтимал өсу нүктелері биотехнология мен ұзақ өмір сүру, робототехника мен автономды жүйелер, ғарыш экономикасы, виртуалды шындық, энергия жинақтау жүйелері, сондай-ақ климатқа бейімделу шешімдері болуы мүмкін. Бұл ретте белсенді әрі салауатты өмірді ұзартуға бағытталған инвестициялар еңбек нарығындағы ұзақмерзімді проблемаларға берілетін жауаптардың бірі ретінде қарастырылады.
ЕАДБ сарапшылары 20 жыл бедеріндеең ықтимал жеті инвестициялық бағытты бөліп көрсетеді. Олар: биотехнология және ұзақ өмір сүру, робототехника мен автономды жүйелер, ғарыш экономикасы, виртуалды шындық, энергияны сақтау мен энергетикалық желілер, климаттық технологиялар және кванттық есептеулер.
Егер жақын арадағы перспектива туралы айтатын болсақ, авторлардың бағалауынша, жаңа толқын қалыптастыруға биотехнология, робототехника, виртуалды шындық және ғарыш экономикасының мүмкіндігі жоғары.
Зерттеуде биотехнологияларға ерекше назар аударылған. Бұл тек нарықтың ауқымды әлеуетіне ғана емес, сонымен қатар болашақтағы негізгі мәселелердің бірі – жұмыс күші тапшылығын шешудегі рөліне байланысты. Халықтың қартаюына қарай белсенді әрі өнімді өмір кезеңін ұзартуға қабілетті технологиялардың маңызы артып келеді.
Бағалауға сәйкес, 2024-2025 жылдары жаһандық биотехнология нарығының көлемі 1,9-2,2 трлн доллар деңгейінде болған және 2034 жылға қарай шамамен 5,9 трлн долларға дейін өсуі мүмкін. Робототехника нарығы да елеулі әлеует көрсетіп отыр: 2025 жылғы 64,8 млрд доллардан 2035 жылға қарай 376 млрд долларға дейін ұлғаюы ықтимал. Виртуалды шындық сегменті де қарқынды – 2025 жылғы шамамен 75 млрд доллардан 2035 жылға қарай 693 млрд долларға дейін өсім көрсетуде.
Баяндамада салауатты өмір ұзақтығының артуының макроэкономикалық әсері де жеке қарастырылған. Сарапшылардың есебінше, белсенді өмірдің қосымша бір жылы әлемнің ірі экономикаларының ЖІӨ-сіне елеулі жинақталған үлес қоса алады: 20 жыл көкжиегінде Қытай үшін шамамен 18,2 трлн доллар және АҚШ үшін 15,1 трлн доллар. Бұл денсаулық сақтау, қартаюдың алдын алу және биотехнологияларға салынатын инвестициялар әлеуметтік қана емес, маңызды экономикалық міндетке де айналып отырғанын білдіреді.
Сонымен қатар авторлар әрбір жаңа технологиялық толқын мүмкіндіктермен қатар, қайта бағалау тәуекелдерімен де байланысты екенін атап өтеді. Құжатта «креативті өзін-өзі алдау» термині қолданылады – бұл технологияның жарияланған даму деңгейі оның нақты жетілуінен айтарлықтай озып кеткен жағдай. Осыған байланысты инвесторлар мен мемлекеттер үшін негізгі міндет перспективалы бағыттарды таңдау ғана емес, олардың даму сатысын барабар бағалау болып отыр.
Жаңа технологиялық шындық жағдайында инновацияларды жылдам игеру және ауқымдау қабілеті шешуші факторға айналады. Дамушы елдер үшін бұл тек инвестиция үшін ғана емес, жаңа нарықтарға интеграция жылдамдығы, құзыреттер деңгейі және институттардың экономикалық өсімнің келесі кезеңіне дайындығы үшін де бәсекенің күшеюін білдіреді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
