Павлодар облысы 280 мыңнан астам турист қабылдауға дайындалып жатыр
Былтыр өңірдің туризм саласына салынған инвестиция 21,4 млрд теңгені құраған
Павлодар облысы әкімі Асайын Байханов Баянауылда өңірдің жазғы туристік маусымға дайындық мәселесі бойынша көшпелі жиналыс өткізді, деп хабарлайды Kapital.kz іскерлік ақпарат орталығы.
Былтыр Павлодар облысына 240 мыңнан астам турист келген. Облыс әкімдігінің мәліметінше, келушілердің 160 мыңнан астамы Баянауыл курорттық аймағын таңдаған.
Биыл туристер санын 282 мыңға дейін жеткізу жоспарланып отыр. Бұл ретте шетелдік туристер ағынын үш еседен астам арттыруға ерекше мән берілуде. Бүгінде демалыс орындары 7% өсіп, 10 мыңнан астам өсек-орынға жетті, ал көрсетілген қызмет көлемі 28%-ға артқан.
«2025 жылы салаға тартылған инвестиция көлемі 21,4 млрд теңгені құрап, жоспардан айтарлықтай асып түсті. 2026 жылы да өсім жалғасады деп күтілуде», делінген ақпаратта.
Облыс әкімігің сөзінше, инфрақұрылым жеткілікті деңгейде дамымаған: толыққанды кәріз жүйесі жоқ, автотұрақтар, жарықтандыру, қоқыс жәшіктері мен шағын сәулет нысандары жеткіліксіз.
Бүгінде облыста 45 жағажай жұмыс істйді, олардың 18-і жабдықталып, кәсіпкерлерге бекітілген. Туристік аймақтарда қауіпсіздік күшейтіліп жатыр.
Жасыбай көлінде полицияның арнайы бөлімшелері, медицина қызметі мен құтқарушылар кезекшілік етеді, бейнебақылау камералары мен құтқару мұнаралары орнатылған. Ал Сабындыкөл жағажайын абаттандыру және бақылау алаңын салу жобалары жүзеге асырылды, Баянауылда визит-орталықтың құрылысы жалғасуда.
Сонымен қатар Жасыбай көлінің жағажайын ауқымды түрде абаттандыру жоспарланып отыр. Бұған қоса Павлодарда Novotel брендімен қонақүй, аквапарк, эко-қалашық және мәдени-демалыс орталығын салу сияқты ірі инвестициялық жобалар іске асырылып жатыр.
Әкімдік жаңа туристік нүктелерді дамытуға да ерекше назар аударылатынын атап өтті. Мәселен, Аққулы ауданындағы Тұзқала көлі қазірдің өзінде мыңдаған туристі тартып отыр.
Шарбақты ауданында Маралды көлі курорттық аймағы қарқынды дамып, соңғы жылдары демалушылар саны сегіз есеге жуық артты. Енді Ертіс орманы аумағында да экологиялық кешендер мен жаңа туристік бағыттар құру жоспарланып отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
