Қазақстанда халықаралық жүк тасымалына сұраныс төмендеді – сарапшы
Ішкі нарықта жүк жеткізуге сұраныс өсімін сақтап отыр
2026 жылдың бірінші тоқсанында Қазақстанда экспорттық-импорттық жүк тасымалдарына өтінімдер саны айтарлықтай азайды. Ал ел ішіндегі жүк жеткізуге сұраныс әлі де өсіп келеді. Мұндай үрдістерді өз деректері негізінде халықаралық «ATI.SU логистикалық платформасы» тіркеп отыр, деп хабарлайды Kapital.kz іскерлік ақпарат орталығы компанияның баспасөз қызметіне сілтеме жасап.
2026 жылдың бірінші тоқсанында Қазақстаннан басқа елдерге жүк тасымалдауға берілген өтінімдер саны жылдық мәнде 32%-ға, ал өткен жылдың төртінші тоқсанымен салыстырғанда 28%-ға қысқарған.
Жүк тасымалындағы төмендеу негізінен Ресей бағытына орын алып отыр: өткен жылмен салыстырғанда – 36%. Өзбекстанға тасымал бойынша да өтінімдер аздап азайған. Ал Қытай мен Беларусь бағыттарына жүк жеткізуге сұраныс, керісінше, артқан.
Импорттық тасымалдарға өтінімдер саны жылдық мәнде 16%-ға, ал өткен тоқсанмен салыстырғанда 68%-ға төмендеген.
Бұл бағытта да негізгі төмендеу Ресей бағытына тиесілі: жылдық мәнде –18%. Сонымен қатар Польша, Литва, Германия сияқты бірқатар еуропалық елдер бойынша да төмендеу байқалады. Ал Түркия мен Беларусь бағыттары оң динамика көрсеткен.
Ішкі тасымалдар сегментінде оң динамика сақталуда: жылдық өсім +29%. Дегенмен алдыңғы тоқсанмен салыстырғанда 12%-ға төмендеу тіркелген.
«Қазақстанда ішкі тасымалдардың тұрақты өсімі сақталып отыр. Ал өткен тоқсанмен салыстырғандағы аздап төмендеу маусымдық факторлармен байланысты – жыл соңында жаңа жыл алдындағы жеткізілімдерге байланысты сұраныс әрдайым артады. Халықаралық тасымалдарға келсек, жыл басында Ресей бағыты бойынша жағдай нашарлады. Бұл негізінен кедендік бақылаудың күшеюі мен шекарадағы кезектерге байланысты. Мәселе өткен жылдың күзінен бері жалғасып келеді, алайда барлық жүк жөнелтушілер бірден әрекет еткен жоқ – жеткізу тізбектерін қайта құру процесі әлі де жалғасуда», – деді халықаралық «ATI.SU логистикалық платформасының» Қазақстандағы өкілдігінің директоры Рената Зобова.
Еске сала кетейік, 2026 жылдың 11 ақпанынан бастап Еуразиялық экономикалық одақ (ЕАЭО) аумағында транзиттік және халықаралық жүк тасымалдарын бақылаудың жаңа тәртібі күшіне енді. Жүктердің қозғалысын нақты уақыт режимінде бақылауға мүмкіндік беретін навигациялық пломбаларды кезең-кезеңімен енгізу басталды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
