Бірінші тоқсанда Қазақстанда 3,7 млн тонна мұнай өнімдері өндірілді
Жанар-жағармайдың қажетті қоры толық көлемде жасалған
Қаңтар-наурыз айлары аралығында Қазақстанда 3,7 млн тонна мұнай өнімдері өндірілді, деп хабарлайды Kapital.kz іскерлік ақпарат орталығы энергетика министрлігінің баспасөз қызметіне сілтеме жасап.
«Қазақстанда жанар-жағармайдың қажетті қоры толық көлемде жасалған. 2026 жылдың бірінші тоқсанының қорытындысы бойынша республикада мұнай өнімдері өндірісінің көлемі 3,7 млн тоннаға жетті, ал жылдық болжам 15,4 млн тонна деңгейінде белгіленген. Өндіріс құрылымында әлеуметтік маңызы бар отын түрлері негізгі үлесті алады: бензин өндірісі 1,6 млн тоннаны, дизель отыны шамамен 1,5 млн тоннаны құрады», – деп хабарлады энергетика министрлігі.
Нарықтың ағымдағы қажеттіліктерін қамтамасыз етумен қатар, елдің мұнай өңдеу әлеуетін арттыру бағдарламасы да жүзеге асырылуда. Қолданыстағы кәсіпорындардың қуатын кеңейту бойынша жұмыстар жүргізіліп жатыр.
Павлодар мұнай-химия зауытының қуатын 5,5 млн тоннадан 9 млн тоннаға дейін, Шымкент мұнай өңдеу зауытының қуатын 6 млн тоннадан 12 млн тоннаға дейін, ал Атырау мұнай өңдеу зауытының қуатын 5,5 млн тоннадан 6,7 млн тоннаға дейін ұлғайту жоспарлануда.
Сонымен қатар жылына 10 млн тонна мұнай өңдейтін жаңа мұнай өңдеу зауытын салу жобасын жедел іске асыру бойынша шаралар қабылдануда.
Айта кетейік, бұған дейін энергетика вице-министрі Қайырхан Тұтқышбаев мемлекет бензин бағасының күрт өсуіне жол бермейтінін мәлімдеген болатын.
2025 жылдың қазан айында Қазақстанда АИ-92 маркалы бензин мен дизель отынының бағасын көтеруге мораторий енгізілген еді. 1 сәуірден бастап оның әрекеті тоқтатылды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
