Қаржы министрлігінде медициналық сақтандыру қорының шығыстары қайта қаралуда
Ведомство Әлеуметтік медициналық сақтандыру қорының құрылымын оңтайландыруды жоспарлап отыр
Үкіметтегі брифингте қаржы вице-министрі Ержан Біржанов міндетті әлеуметтік медициналық сақтандыру жүйесіндегі тиімсіз шығындарды қысқарту және қор жұмысын реформалау бойынша қабылданып жатқан шаралар туралы айтты, деп хабарлайды Kapital.kz іскерлік ақпарат орталығының тілшісі.
«Негізгі назар цифрландыруға аударылып отыр. Денсаулық сақтау және қаржы министрліктерінің көптеген дерекқорларымен біріктірілген «Qalqan» бірыңғай платформасы іске қосылды. Қаржылық ағындарға бақылау күшейтілді. Бірнеше платформамен интеграция скоринг жүргізуге және негізсіз төлемдердің алдын алуға мүмкіндік береді», – деді Ержан Біржанов.
Сонымен қатар, вице-министрдің айтуынша, жүйе ішіндегі басқарушылық бақылау күшейтіліп, өкілеттіктерді бөлу тетіктері қайта қаралуда.
«Бұдан бөлек, қаржылық өкілеттіктерді орталықтандыру жұмыстары басталды», – деп нақтылады ол.
Әсіресе қордың ішкі құрылымын оңтайландыру мәселесіне ерекше көңіл бөлініп отыр.
«Қордың өзі реформалау кезеңінде. Ол көпдеңгейлі құрылым, өңірлік бөлімшелерде қызметкерлер саны көп. Сондықтан бұл қордың жұмысын оңтайландыру қажет», – деп түйіндеді Ержан Біржанов.
Ұлттық құрылтайдың 2026 жылғы 20 қаңтардағы отырысында Президент Әлеуметтік медициналық сақтаныру қорында жүргізілген кешенді тексеріс бірқатар бұзушылықтар мен заңсыздықтарды анықтағанын атап өткен болатын. Құқық қорғау органдарына «сыбайлас жемқорлық схемаларының пайдасын көрген барлық тұлғаларды анықтау» тапсырылды.
Премьер-министр Олжас Бектенов Әлеуметтік медициналық сақтаныру қорын қаржы министрлігінің қарамағына беру туралы тапсырма берді. Ал жаңа басқарма төрағасы Гүлмира Сәбденбек қолданыстағы қор жүйесіне жасалған талдау нәтижелерін хабарлаған еді. Оның айтуынша, негізгі мәселе – басқарудың тұтас процесінің болмауы және жүйенің пациент пен жалпы денсаулық сақтау нәтижесіне емес, көрсетілген қызмет көлеміне бағдарлануы.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
