МӘМС-ті реформалаудың экономикалық әсері 255,2 млрд теңгені құрайды
Qalqan бірыңғай қаржыландыру порталы қазынашылық жүйесімен біріктірілді
Мемлекеттік кірістерге шекаралық өткізу бекеттерін жаңғырту және әлеуметтік саладағы цифрлық шешімдер айтарлықтай оң әсер берді. Бұл туралы үкімет отырысында қаржы министрі Мәди Такиев мәлімдеді, деп хабарлайды Kapital.kz іскерлік ақпарат орталығының тілшісі.
«Біріншіден, тоғыз өткізу бекетін жаңғырту кедендік төлемдердің өсуіне тікелей әсер етті. Олар 922 млрд теңгеге жетіп, өткен жылдың сәйкес кезеңімен салыстырғанда 65 млрд теңгеге артты. Сонымен қатар өткізу қабілеті 18%-ға өсіп, шамамен 400 мың автокөлікке жетті. Нәтижесінде «Қапланбек», «Б. Қонысбаев» өткізу бекеттері арқылы өтетін жеке тұлғалар саны 53%-ға артып, 2,4 млн адамға жетті», – деді министр.
Екіншіден, әлеуметтік саладағы бюджеттік шығындарды цифрландыру жүзеге асырылуда.
«Денсаулық сақтау саласында қазынашылық жүйесімен біріктірілген Qalqan бірыңғай қаржыландыру порталы іске қосылды. Бүгінде 1,6 мыңнан астам медициналық ұйым қосылған, төлемге дейін негізсіз есептеулерді анықтауға мүмкіндік беретін антифрод-контур жасалды. МӘМС 2.0 реформасының жиынтық экономикалық тиімділігі 255,2 млрд теңгені құрайды. Білім беру саласында 3 895 мектеп цифрландырылды, 4 400 балабақша, 1 337 қосымша білім беру ұйымы, 96 ЖОО және 230 мыңнан астам студент стипендиямен қаржыландырылды. Білім беру саласында бірыңғай Data Hub қалыптасуда, ол қаржыландыру мен шешім қабылдауды нақты деректер негізінде жүргізуге және бюджет қаражатының тиімділігін бағалауға мүмкіндік береді», – деді Мәди Такиев.
Білім беру саласын мемлекеттік қаржыландырудың қазіргі тәртібі бұрмаланған және шұғыл түзетуді талап етеді. Бұл туралы Ұлттық құрылтайда мемлекет басшысы Қасым-Жомарт Тоқаев мәлімдеген болатын. Үкіметке білім беру саласын мемлекеттік қаржыландыру тетігін шұғыл реформалау, нақты критерийлер қалыптастыру және орта білім жүйесін дамытудағы бизнестің оң рөлін ескеру міндеті қойылды.
Премьер-министр Олжас Бектенов жаңадан ашылатын жекеменшік мектептерде мемлекеттік тапсырыс орналастыруға мораторий енгізуді тапсырды. Премьер-министрдің орынбасары – мәдениет және ақпарат министрі Аида Балаева үкімет білім және денсаулық сақтау салаларындағы мемлекеттік-жекеменшік әріптестік тетіктерін жүйелі қайта қарауды бастағанын хабарлаған болатын. Ол жан басына шаққандағы қаржыландыру қағидаттарын реформалау қажеттігін де атап өтті.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
