• Басты бет
• Государство
• Инвесторларға кедергі жасағандар жазаланады: Бектенов ескерту жасады

Инвесторларға кедергі жасағандар жазаланады: Бектенов ескерту жасады

Қазақстанда инвестициялық тосқауылдар қалай жойылады және бизнеске қысым жасағандар қалай жазаланады?

Премьер-министр Олжас Бектенов инвесторлар құқықтарын қорғау және инвестициялық жобаларды жүзеге асырудағы әкімшілік кедергілерді жою мәселелері бойынша кеңес өткізіп, мемлекеттік органдардың жауапкершілігін күшейтуді тапсырды, деп хабарлайды Kapital.kz іскерлік ақпарат орталығы Үкіметтің баспасөз қызметіне сілтеме жасап.

Жиында Бас прокурор Берік Асылов соңғы үш жылда бизнеске қатысты қылмыстық істер саны 4 есеге немесе 71,5%-ға азайғанын мәлімдеді. Қазіргі таңда прокурорлар 3 мыңнан астам инвестициялық жобаны сүйемелдеп отыр.

Үкімет жанындағы Инвестициялық штаб проактивті режимде жұмыс істейді. Биылғы бірінші тоқсанда жалпы құны 25,5 млрд доллар болатын 44 жоба қаралған. Бұл процестің орындалуын Бас прокуратура бақылауда ұстап отыр.

Сонымен қатар өңірлерде әкімдер жетекшілік ететін инвестициялық штабтар жұмыс істейді. Қарағанды, Шығыс Қазақстан, Атырау, Ақтөбе, Қызылорда, Ұлытау облыстары мен Алматы қаласында жобаларды келісу деңгейі 100%-ға жеткен.

Сыртқы істер министрлігі мен Бас прокуратура бірлесіп инвестициялық жобаларды қолдау бойынша жол картасын әзірлеген. Онда келісімшарт рәсімдерін жеңілдету, жер телімдерін беру процестерін оңтайландыру және инвестициялық кураторлықты дамыту көзделген.

Инвесторлардың өтініштері бойынша да оң динамика байқалады. Бірінші тоқсанда 273 өтініш түсіп, олардың жартысына жуығы шешімін тапқан. Өтініштердің басым бөлігі салықтық әкімшілендіру, кедендік рәсімдер мен жер пайдалану мәселелеріне қатысты.

Бас прокуратураның Инвесторлардың құқықтарын қорғау комитетінің төрағасы Бауыржан Ералы биылдың өзінде 600 инвестордың құқы қорғалғанын хабарлады. Түскен 213 өтініштің 40%-ы толық қанағаттандырылып, 50%-ы бойынша құқықтық түсіндіру берілген.

Мысалы, Алматы облысында қағаз өнімдерін шығаратын компания отандық өндірушілер тізіліміне енгізілсе, Атырау облысында ірі энергетикалық жобаға инженерлік желілерге қолжетімділік қамтамасыз етілген.

Премьер-министр инвесторлардың әрбір өтініші нақты шешім талап ететінін атап өтті.

«Инвесторлардан келіп түсетін әрбір өтініштің артында, шын мәнінде капиталды орналастыру, жаңа өндірістер ашу және қолданыстағы өндірістерді кеңейту, жаңа жұмыс орындарын құру туралы шешімдер тұрғанын үнемі назарға алу керек. Сондықтан инвесторлардың мәселелерін жедел реттеу – бұл мемлекеттік аппараттың инвестициялар тарту бағытындағы жұмысының тиімділігін көрсетеді. Мемлекеттік органдардың өтініштерге жауап беруден жалтаратын немесе жауапкершілікті біріне бірі ысыратын лауазымды тұлғаларына қатысты ең қатаң шаралар қабылданатын болады», — деді Олжас Бектенов.

Сонымен қатар Үкімет инвестициялық жобаларды тежейтін жүйелі проблемаларды атады. Олардың қатарында мемлекеттік органдар арасындағы үйлестірудің әлсіздігі, жауапкершіліктің нақты бөлінбеуі, қызмет көрсету мерзімдерінің бұзылуы және жергілікті деңгейдегі бақылаудың жеткіліксіздігі бар.

Осыған байланысты өңір әкімдеріне ірі жобаларды «қолмен басқару» режимінде сүйемелдеу, жер мен инфрақұрылым беру кезінде ашықтықты қамтамасыз ету тапсырылды.

Бұған қоса Ұлттық цифрлық инвестициялық платформаға (ҰЦИП) қатысты да сын айтылды. Қазір жүйеге жалпы құны шамамен 100 трлн теңгеге 3 мыңнан астам жоба енгізілгенімен, 400-ден астам жоба әлі тіркелмеген.

Стратегиялық жоспарлау және реформалар агенттігінің төрағасы Әсет Ерғалиев әкімшілік кедергілерді жою үшін жасанды интеллектіні қолдануды ұсынды. Бұл артық талаптарды анықтап, рәсімдерді жеңілдетуге мүмкіндік береді. Ал Премьер-министрдің кеңесшісі Әлішер Қожасбаев инвесторлармен жұмысты жақсарту үшін «бір терезе» қағидатын күшейтуді ұсынды.

Kazakh Invest басқарма төрағасы Сұлтанғали Кенжеқұлов шетелдегі өкілдіктерді толыққанды инвесторларды қолдау орталықтарына айналдыру жоспарын таныстырды. Бұл инвесторларға жобаларды Қазақстанға келмей-ақ пысықтауға мүмкіндік береді.

Кеңес қорытындысы бойынша Үкімет заңнамаға ревизия жүргізу, инвестициялық өтініштерді цифрландыру, барлық жобаларды бірыңғай платформаға енгізу және инвесторларға қызмет көрсетуді жеделдету бойынша нақты тапсырмалар берді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз