• Басты бет
• Государство
• Алматыдағы «Байсат» нарығын қайта сату мүмкін болмады

Алматыдағы «Байсат» нарығын қайта сату мүмкін болмады

E-qazyna алаңында өткен аукционға қатысушылардан өтінім түскен жоқ

Алматыдағы «Байсат» базарын E-qazyna платформасы арқылы сату бойынша өткен аукцион тағы да өтпей қалды. Бұған дейін бұл сауда нысаны Қайрат Сатыбалдының ұлына тиесілі болған, деп хабарлайды Kapital.kz іскерлік ақпарат орталығының тілшісі.

30 сәуір күні өткен аукционға «Байсат» көтерме-бөлшек сауда орталығы» ЖШС шығарылған болатын. Сауданың бастапқы бағасы 28 млрд 639 млн теңге көлемінде белгіленген.

Алайда «E-qazyna» сайтындағы мәліметке сәйкес, аукцион басталған сәтте қатысушылар тарапынан ешқандай өтінім тіркелмеген.

Аукционға қатысу үшін 2,8 млрд теңге көлемінде кепілдік жарна енгізу талап етілген. Сонымен қатар бір қатысушы болған жағдайда да объектіні сату мүмкіндігі қарастырылған, алайда сатып алушыға бөліп төлеу мүмкіндігі берілмеген.

Нысанды сатушы ретінде «Қайтарылған активтерді басқару компаниясы» ЖШС көрсетілген.

«Байсат» базарын алғаш рет 2025 жылдың қараша айында 28,6 млрд теңгеге сату әрекеті жасалған, алайда ол кезде де бірде-бір өтінім түспей, аукцион өтпеген. Кейін желтоқсан айында қайта сатылымға шығарылып, бастапқы баға 26,7 млрд теңгеге дейін төмендетілген.

2026 жылдың ақпан айында КУВА нысанды «максималды жеңілдікпен» 24,7 млрд теңгеге ұсынған. Сол кезде компания бұл баға бастапқы бағалаудан едәуір төмендетілгенін және инвесторлар үшін тиімді мүмкіндік екенін айтқан.

Сәуір айында сауда қайта жоспарланып, 8 сәуірге белгіленген болатын. Ол кезде бастапқы баға қайта өсіп, 28,6 млрд теңге деңгейіне жеткен. Алайда бұл аукцион да өтпеген болуы мүмкін. Кейін сауда 30 сәуірге ауыстырылған.

«Байсат» базары Алматы қаласының Жетісу ауданында, Солтүстік айналма көшесінде орналасқан. Бағалау есебіне сәйкес, жер учаскесінің аумағы 12,2434 гектардан асады, ал сауда кешенінің жалпы ауданы 88 821 шаршы метрді құрайды. Нысанның техникалық жағдайы «жақсы» деп бағаланған, ал толтырылуы 100% деңгейінде көрсетілген.

Айта кетейік, бұған дейін Алматы прокуратурасы 2024 жылғы 17 қаңтарда Алматы жылу холдингі (қазіргі «Байсат» базары) мүлкіне қатысты барлық мәмілелерді жарамсыз деп тану туралы мамандандырылған ауданаралық экономикалық сот шешімінің күшіне енгенін хабарлаған болатын. Сол кезде активті сату заңсыз деп танылған.

Прокуратура мәліметіне сәйкес, жалпы ауданы 4 221,4 шаршы метр болатын үш нысан және 1,4 гектар жер аффилиирленген компаниялар – «КазГерСтрой» бірлескен кәсіпорны мен «Astana Finansial Group» ЖШС-нің меншігінде болған. Бұл компаниялар Қайрат Сатыбалдының ұлы Бауыржан Нұрсұлтанға тиесілі деп көрсетілген.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз