• Басты бет
• Государство
• Қазақстанда автомектептерге бақылау күшейтіледі: 700-ден астам оқу тобы жабылды

Қазақстанда автомектептерге бақылау күшейтіледі: 700-ден астам оқу тобы жабылды

ІІМ тексерісі нәтижесінде техникалық талаптарды бұзған ондаған ұйым анықталды, заңнамаға өзгеріс енгізу жоспарланып отыр

Қазақстанда автомектептердің қызметіне бақылау күшейтіліп жатыр. Қазақстан Республикасы Ішкі істер министрлігі жүргізген тексерулер барысында бірқатар заңбұзушылықтар анықталып, жүздеген оқу тобының жұмысы тоқтатылды, деп хабарлайды Kapital.kz іскерлік ақпарат орталығы министрліктің баспаcөз қызметіне сілтеме жасап.

Ведомство мәліметінше, қазіргі уақытта елде 727 автомектеп жүргізушілерді даярлайды. Тексеру барысында көптеген оқу орындарында автодромдардың талапқа сай еместігі белгілі болды: жол белгілері мен жол таңбалары жеткіліксіз, жарықтандыру жүйесі нашар. Сонымен қатар кейбір оқу көліктерінің техникалық ақаулары бар екені анықталған. Аталған кемшіліктерді жою үшін 20 ұйғарым берілді.

Бұдан бөлек, жүргізушілерді даярлау кезінде міндетті техникалық тексеруден өтпеген және сақтандыру полисі жоқ автокөліктерді пайдаланған 59 оқу ұйымы анықталды. Нәтижесінде ІІМ Әкімшілік полиция комитеті 701 оқу тобының қызметін тоқтатты.

Айта кетейік, Қазақстанда автомектептердің жұмысы «Автомектеп» ақпараттық жүйесі арқылы бақыланады. Бұл жүйе арқылы оқу топтарын тіркеу, жүргізуші куәлігінің заңдылығын тексеру, оқу бағдарламасы мен көліктердің есебін онлайн режимде қадағалауға болады.

Бақылауды одан әрі күшейту үшін заңнамалық өзгерістер де ұсынылып отыр. Атап айтқанда, автомектептерді ашудың хабарлама тәртібінен рұқсат беру жүйесіне көшу жоспарланған. Сондай-ақ олардың қызметіне мемлекеттік бақылау тетіктерін енгізу көзделген.

Тиісті түзетулерді қамтитын «Жол жүрісі туралы» заңға өзгерістер енгізу жөніндегі заң жобасы қазіргі уақытта Парламент Мәжілісінде қаралып жатыр.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз