• Басты бет
• Государство
• Оң рөлді таксилерге тыйым, самокаттарды сақтандыру: Үкімет жол ережесін өзгертпек

Оң рөлді таксилерге тыйым, самокаттарды сақтандыру: Үкімет жол ережесін өзгертпек

Рөлі оң жақта орналасқан 63 мыңға жуық көлік таксиден шығарылды

Қазақстанда 2026 жылдың 1 шілдесінен бастап электр скутерлерді пайдалануға қосымша талаптар енгізіледі. Онда жауапкершілікті міндетті сақтандыру және кикшеринг компанияларға қойылатын талаптарды қатаңдату қарастырылған, деп хабарлайды Kapital.kz іскерлік ақпарат орталығы.

Премьер-министр Олжас Бектенов төрағалығымен өткен құқық бұзушылық профилактикасы жөніндегі ведомствоаралық комиссия отырысында әкімдіктерге қысқа мерзімде электр скутерлердің тұрақ орындарын анықтауды және қозғалыс үшін тыйым салынған тиісті жол белгілері бар аймақтарды белгілеуді, өңірлік жоспарларда веложолдарды дамытуды қарастыруды тапсырылды.

Көлік министрлігінің мәліметінше, жол желілерін жаңғырту шеңберінде соңғы 5 жылда 11 мың шақырым жол немесе еліміздегі жолдардың жалпы ұзындығының 45%-ы I және II техникалық санаттарға ауыстырылды. Бұл қарама-қарсы бағыттарды бөлу және жүру бөлігін кеңейту есебінен қауіпсіздік деңгейін арттырды.

Транзиттік көліктер елді мекендерге соқпауы үшін 65 айналма жол және 38 жерүсті жаяу жүргіншілер өткелі салынды. 2030 жылға дейін тағы 2 мың шақырым жолды ауыстыру жоспарлануда, олардың кейбірі бойынша жұмыстар басталды.

«Жолаушылар тасымалы нарығын реттеу бойынша да жұмыстар жүргізілуде. ІІМ-мен және такси агрегаторларымен бірлесіп тасымалдау процесінен рөлі оң жақта орналасқан 63 мыңға жуық автомобиль шығарылды. Ал бұрын рөлі оң жақта болған, яғни қайта жабдықталған автокөліктерді таксиде пайдалануға тыйым салуды, сондай-ақ тасымалдаушылар мен жүргізушілерді бақылау үшін агрегаторлардың жауапкершілігін күшейтуді көздейтін заңнамалық түзетулер әзірленуде», делінген Үкіметтің баспасөз қызметі таратқан ақпаратта.

Астана әкімі Жеңіс Қасымбектің мәліметінше, елордада тәртіп бұзушылықтарды автоматты түрде тіркеу жүйелері күшейтілген. Қазіргі таңда қалада 6,1 мың бейнебақылау камерасы жұмыс істеп тұр, сондай-ақ инфрақұрылымдық шешімдер жүзеге асырылуда, оның ішінде 1,3 мың шақырым жарықтандыру, 1,7 мың шақырым веложолдар және 53,6 мың шақырым жаяу жүргіншілер жолы бар.

Түркістан облысының әкімі Нұралхан Көшеровтің айтуынша, бақылау жүйесі кеңейтілуде: 131 «Сергек» кешені және 282 стационарлық кешен жұмыс істейді, сондай-ақ 24 учаскеде 48 «ақылды» камера орнатылған.

Бұған қоса, Алматыда жол қозғалысын автоматты түрде тіркеу жүйелері кеңейтілуде және трафикті басқарудың интеллектуалды жүйелері енгізілуде, оның ішінде бағдаршам нысандары мен реттелетін жаяу жүргіншілер өткелдері бойынша жобалар жүзеге асырылып жатыр.

Алайда Премьер-министр кейбір көрсеткіштердің төмендегеніне қарамастан, жолдардағы жағдай қауіпсіздікті арттыру бойынша қосымша шаралар қабылдауды талап ететінін атап өтті. Оның ішінде азаматтардан келіп түскен шағымдарға байланысты электрлі велосипедтер мен мопедтер жүргізуді реттеуге бақылауды күшейтуге назар аудару қажеттігіне тоқталды.

ІІМ мәліметі бойынша, енді мұндай көлік құралдарының жүргізушілері жол қозғалысы ережелерін сақтауға және жүргізуші куәлігін алуға міндеттелді.

«Жүргізушілер ережелерді тек камералардың «бақылау аймағында» ғана емес, үнемі сақтау керектігін біржола түсінуге тиіс. Елордада «жасырын» патрульдеу тәжірибесі сәтті қолданылуда. Белгілі бір нәтиже бар. Қалған өңірлерге де бұл тәжірибені енгізу керек», деп атап өтті Олжас Бектенов.

Сонымен қатар ол тиісті министрліктер мен әкімдіктерге бірқатар тапсырма берді:

Ішкі істер, Оқу-ағарту, Мәдениет және ақпарат министрліктері, әкімдіктер жол қозғалысы мен қауіпсіздік ережелерін сақтау бойынша ақпараттық-түсіндіру жұмыстарын күшейтсін. Әсіресе, мектеп демалысы қарсаңында мектеп оқушылары мен ата-аналармен бұл жұмысты күшейту қажет.

Көлік министрлігі автокөліктерді техникалық тексеруден өткізу жүйесін, оның ішінде Ішкі істер министрі айтқан ұсыныстарды ескере отырып, өзектендіруі керек. Бұл ретте орташа жылдамдықты бекіту оң нәтиже бергені атап өтілді. Бұл орайда тек ақылы республикалық трассалармен шектелудің қажеті жоқ екені баса айтылды. Көлік министрлігіне әкімдіктермен бірлесіп, аймақтық жолдарға тиісті камераларды орнату мәселесін шешу тапсырылды.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз