Біз кәсіпкерлердің өмір сүру сапасын арттыруға көмектесеміз
АВТОР

22.09.2015 • 13:13 2204

Біз кәсіпкерлердің өмір сүру сапасын арттыруға көмектесеміз

Бизнесті үздіктерден үй ренгісі келетіндер жайында Әсел Сыдықова айтып берді

Алматыда қараша айында алғаш рет Global Business Forum халықаралық конференциясы өтеді. Компанияның негізін қалаушы әрі бас директоры Әсел Сыдықова форумның басты міндеті – табысқа ұмтылған әрбір адамның жаңа толқынның үздік бизнесмендері мен тренерлерінен тәжірибе үйренуіне мүмкіндік беру екенін айтады. Аты аталған спикерлер арасында – миллиондаған жанның кумиріне айналған әйгілі актер әрі режиссер Жан-Клод ван Дамм, ForbesWoman мультимедиялық платформасының негізін қалаушы әрі президенті Мойра Форбс, сондай-ақ, Солтүстік Америкадағы Ferrari компаниясының бұрынғы президенті әрі бас директоры Жан Луиджи Лонджинотти-Буитони де бар. Бұл жобаның ерекшелігі неде және бизнесті үздіктерден үйренгісі келетін әрбір адамның неліктен форумға келуі керектігі туралы Әсел Сыдықова «Капитал.kz-ке» берген сұхбатында айтып берген еді.

- Әсел, форумның жарнамалық кітапшасында оншақты жыл бұрын Лондон шетіндегі шағын бір кафеде жұмыс істеп жүріп, сізге осындай бір іс-шараға қатысудың сәті түскені туралы айтылыпты. Сіз үлкен залдағы соңғы қатарлардың бірінде деміңізді іштен алып, спикерлерді қалт жібермей тыңдаған екенсіз... Мұны голливудтық мәнердегі әдемі әңгіменің бірі дейміз бе?

Жоқ, бұл жай ғана әңгіме емес, ақиқат шындық. Мен ешқашан өзім туралы аңыз құрастырған емеспін. Сіздің алдыңызда отырған жан – менмін, бар шынайы болмысым осы. Менің жүріп өткен жолым текке кеткен жоқ, мен ештеңені алып-қосқан емеспін. Егер қалыптасудың дәл осындай жолынан өтпегенімде, менің тұлға болып қалыптасуым да екіталай болар еді. Өзім туып-өскен Қырғызстанда университет бітірген соң, MTV-дің жұлдызы болғым келген, бірақ тіл үйреніп, өзімнің ортамды мүлдем өзгертіп, бәрін басынан бастау үшін Ұлыбританияға, Лондонға кеттім. Табысты жандар конгресінің Ричард Брэнсон сөз сөйлеген сондай форумдарының бірінде келгенімде, егер жақсылап меңгеріп алсам, егер қолымда қандай да бір қажетті құралдар болса, сол құралдармен қаруланып алсам, қалаған нәрсемнің бәріне қол жеткізетінімді түсіндім. Менің бүкіл ұмтылысым, тынымсыз еңбектенуім кейіннен осы конгрессті ұйымдастырған компанияда жұмысқа орналасуыма септігін тигізді. Мен өнімдерді телефонмен сататын сатушы болып бастағанмын, бірақ көп ұзамай, үш айдың ішінде үздік сатушы болып шыға келдім. Ағылшындар бастапқыда маған күмәнмен қарайтын, өйткені ағылшын тілін акцентпен сөйлейтінімді, тіпті менің құр бекерге әуреленіп жүргенімді айтқандар көп болды. Бірақ ондай сөздер мені тек алға итермелей түсті. 6 ай өткен соң мені менеджер етіп тағайындады, сөйтіп әлгі адамдарға енді мен басшылық ете бастадым, ал бір жылдан соң бүкіл еуропалық аймақты басқаратын деңгейге көтерілдім. Бірінші жылы сатылымды 20%-ға ұлғайттым, содан соң сатылым 70%-ға дейін артты. Біздің Ресей мен Балтық жағасында ірі серіктестеріміз пайда болды.

Әлемнің ең озық компанияларының бірінде жұмыс істей жүріп, мен барынша шынығып, алғаш рет келген клиент өмір бойғы клиентке айналып кететіндей жоғарғы деңгейдегі форумдар жүргізуден тәжірибе жинақтадым.

- GlobalBusinessForum-ды Алматыда өткізу идеясы қалай туып еді?

Форумды дәл осы жақта, Орталық Азияда өткізу туралы шешімнің өзі былтырғы жылғы қазан айында, Хельсинкиге барған кезімде туындаған еді. Серіктестерімнің бірі менің Арнольд Шварценеггердің табынушысы екенімді біліп, маған Солтүстік бизнес-форумға билет сыйлады. Сол жерде Арнольдпен танысып, онымен тіл қатыстым. Ол өзі мен бұрын-соңды көрмеген, жоғарғы деңгейде ұйымдастырылған, сервисі де мықты форум болды. ЕХРО-орталық аумағына алғаш қадам басқаннан-ақ бәрі бізге айрықша ілтипат білдіріп жатты. Тіпті киімімізді гардеробқа өткізіп жатқанда бір серіктесіміздің сырт киімінің ілгегі жыртылып қалған еді, бірінші күн аяқталған соң заттарымызды алуға қайтып келгенімізде, ілгектің тігіліп қойылғандығын көрдік. Қамқорлықтың жоғары деңгейі деген сол шығар. Олардың тіпті: «Егер біз сіздің мәселеңізді 15 минуттың ішінде шеше алмасақ, сыйлық жасаймыз» деген ұраны болды. Сонда біздің форум да осындай болуы тиіс деп ойлаған едім.

Сол кездері маған осында, Қазақстанда форум өткізіп, оған Арнольд Шварценеггерді қатыстыру туралы идея келді. Ал Хельсинкиден Лондонға қайтып оралғанымда, ұшақта отырып, айналамды түгел ұмытып, ойларымды қағазға түсіре бастадым. Ал жерге қонғанда қолымда дайын бизнес-жоспар, осы форумның сұлбасы болды, тіпті оның қалай өтетінін де ойластырып алдым. Мен форумға келген бизнесмен өзінің бизнесін толық жандандырып жіберетін құралдарға ие болып шығатындай сапалы платформа жасасам деймін. Сөйтіп Арнольдқа хат жаздым, оған шотты көрсетіп, келісім-шартты жөнелттік. Бірақ ең үлкен қиындық – сол күні біздің ең үлкен орталығымыз – «Атакент» бос болмай шыққандығы болды, ал Арнольд өз сапарын басқа күнге ауыстыра алмайтын еді. Сондықтан қатты қапаланып қалдым, сөйтіп өзі де форумдар ұйымдастырушы болып табылатын Литвадағы әріптесіме қоңырау шалып, Арнольдты лайықты түрде алмастыра алатын адам керек екенін айттым. Сонда ол Жан-Клод ван Даммен дос екенін, біздің форумға соның келе алатынын жеткізді. Сөйтіп мен өз бизнес-жоспарыма өзгертулер енгізіп, қажетті топты жинай бастадым.

- Бизнес-форум мәнмәтініндегі Арнольд Шварценеггер есімі, әрине, көңілге сенім ұялатады-ақ. Сіз өзгелерге форум жайлы айтып, оларды спикер ретінде Жан-Клод ван Даммды тыңдауға шақырғанда қандай сөздер айтасыз?

Иә, ол аздап ұмыт болып, атағы біраз бәсеңдеп қалды. Мен оны Литвадағы форумда сөз сөйлегенде көргенмін, сонда оның бекерге ел аузындағы аңызға айналмағанын түсінгенмін. Ол туралы «Жабық есіктің ар жағындағы Ван-Дамм» атты бір жақсы фильм бар, сонда оның болмысы, табысты шақтары мен сәтсіздіктері тамаша ашылған, оның жүріп өткен жолының қаншалықты еңбекті, қажырлылықты талап еткенін көресіз. Саясатты шемішкеше шақпаса да, ол бизнесмен, оның өз фитнес-клуб желісі бар. Иә, ол басты спикерлердің бірі, дегенмен ол жалғыз емес. Мен Ferrari президенті Жан-Луиджи Лонджинотти-Буитониге көбірек үміт артып отырмын. Ол Америкадағы Ferrari сатылымын 80%-ға көтерген ең мықты СЕО-лардың бірі. Біздің форумымызда Мойра Форбс та болады, ол аздап әкесінің көлеңкесінде жүргенмен, өз жолын өзі жүріп өткен, Гарвардты бітірген, жалпы, үлкен құрметке лайықты тұлға. Бренд жасай білуге, әйел адамның бизнесте жүруіне, көшбасшылық орынға ие болуға, топ құра білуге қатысты одан да үйренер нәрселер көп. Қазір бұлар өте өзекті тақырыптар, өйткені кәсіпкер әйелдер көбейіп келеді.

- Форум қалай өтпек? Спикерлер шығып, өз бизнес-кейстерімен таныстыра ма әлде ол интерактивті сессия бола ма?

Көптеген форумдар қалыпты түрде өтіп жатады, мысалы, шеберлік сабақтары бөлмесін алайық. Ол бізде мүлдем басқаша болмақ. Біз тіпті форумның 3D-пішінін де жасап қойдық, дегенмен бұрын олай етпейтінбіз, өйткені Еурлпадағы жұрт ондай пішінді жақсы біледі әрі түсінеді де. Онда 5 мың қатысушы отыратын, спикерлер бірінен соң бірі сөз сөйлейтін бір басты зал болады. Мен нағыз құнды білім бере алатын сарапшыларды іріктеп алдым. Онлайн-маркетингте өте танымал бір сарапшы болады, ол үлгіні де, құрылымды да, жүйені де көрсетіп береді – ал да қолдана бер! Тіпті сол үлгіні алып, өз бизнесіңізде қолданып көрсеңіз, жақсы нәтижесін беретін болады.

Нарықты зерттегенде, бұл жаққа кітаптарды немесе YouTube-тегі роликтерді қарап-ақ, өзін тренер санап шыға келетін адамдардың келетіні байқалады. Бірақ олар өз білгенін үлкен ақшаға айналдыра алатын тәжірибе адамдары емес.

Мен біздің бизнесмендерімізге дәл сол тәжірибелік білімді білім иелерінің өзінен, түпнұсқа түрінде берсем деймін. Бұл жай ғана форум емес, біз оны шоу жасасақ дейміз. Келушілер бәріне – сапалы қарым-қатынасқа, сапалы контентке қол жеткізіп, көңіл көтере білуі үшін спикерлердің сөз сөйлеуі арасында әртістер өнер көрсететін болады. Біз форумнан кейін қала апталап, айлап гуілдеп, осы форумды тамсана әңгіме етіп жүрсе дейміз.

- Сіздер өздеріңізді жылдың басты бизнес-форумы ретінде көрсетпексіздер ғой?

Иә, біз Орталық Азиядағы нөмірі бірінші болмақпыз. Қазірдің өзінде форумға деген қызығушылықтар артып келеді. Мен серіктестеріме жиі айтатын бір ғана кедергі – біздің халқымыздың бәрін соңғы сәтте ғана істейтін, яғни, билетті тек іс-шара басталардан бір немесе екі бұрын ғана сатып алатын әдеті бар. Біз үшін алдын ала деген – бір апта бұрын деген сөз, ал мен Еуропада жобалар жасап жүргенімде алдын ала деген – бір жыл дегенді білдіретін, 4 ай бұрын билеттер сатылып кететін. Төрт ай ішінде билетті биылға емес, тек келесі жылға ғана сатып алуға болады. Дегенмен, менталитетті түсінгендіктен, оған да көнуге дайынбыз. Біз кеш қарайғанға дейін жұмыс істейміз, бұл жобада көп адам жұмыс істеп жатыр, дегенмен, біздің Орталық Азиядағы нөмірі бірінші форум болу деген мақсатымыз орындалды.

Менің Қазақстанға келгеніме небәрі үш-ақ ай болды, сондықтан адамдар бір-біріне деген қалай қарайды, бизнесті қалай жүргізеді деген адами қарым-қатынас тұрғысынан қазірше жаңа жерге үйреніп жатырмын. Батыста, Еуропада бизнесмендер тек клиенттің жайын ойлауға көбірек мән бергенімен, бұл жақта ондай қарым-қатынастың онша дамымағанын көріп жүрмін. Барлық коммерциялық ұйымдардың ақша табуды мақсат ететіні түсінікті ғой, бірақ олар табысты тұрақты етіп әрі оны ұлғайта түсу үшін, бизнесті дамыту үшін ең бастысы, адамдардың – клиенттердің жағдайын жасау керектігін түсінбейді. Олар сондай деңгейге қол жеткізсе дейміз. Бұл жақта маған, әсіресе, серіктестік қарым-қатынас тұрғысынан қиынға соғып жатыр. Мәселен, Англияда серіктесіңнің қолын алсаң – келісімге келдің деген сөз, және оны ешбір тарап бұзбайды. Сол елде өткізген 10 жылымның ішінде бір де бір рет серіктестерімнің сөзінде тұрмай кеткен кезі болған емес. Ал мұнда аздап басқаша жағдайға тап болып жатамын, сондықтан осы жағдайға бейімделуге тырысып жүрмін.

- Форум енді жыл сайын өте ме?

Иә, кәсіпкерлер ең мықты кәсіби бизнесмендерден оқып-үйрену мүмкіндігіне қол жеткізу үшін біз оны жыл сайын өткізетін боламыз. Өйткені, осындай форум үшін Ұлыбританияға ұшып баруға ақша жағынан ғана емес, уақыт пен виза тұрғысынан да кез келгеннің шамасы келе бермейді. Ал біз ең үздік оқытушыларды осында алып келіп, оларды тыңдауға мүмкіндік береміз.

Біздің бағаларымыз да қымбат емес, ең мықтыларды тыңдап, олардан біраз нәрсе үйрену үшін, айтылған кеңестерді өз кәсібінде қолданып, сатылымды миллионға дейін жеткізу үшін бизнесменге $247 ғана төлесе жеткілікті – бұл соншалықты қымбат баға емес. Біз бизнесті алға жылжыту үшін көп құндылықтар бере білеміз.

- Бірақ сіздердікі коммерциялық жоба болғандықтан одан жақсы табыс түсіру жағын да ойластыратын шығарсыздар?

Әрине, онсыз болмайды. Дегенмен, мен әрқашан бастысы – өз мақсатымыз екенін айтып жүремін. Негізгі үш қағидамыз бар: біріншіден, біз адамдардың өз өмірлерін өзгертуге, қазіргі сәтте кәсіпкерлерге олардың бизнестерінің сапасын өзгертуге көмектесуге тиіспіз. Біз бизнесте адам өмірінің, қазіргі сәтте, бизнестің сапасын жақсарту үшін жүрміз. Екіншіден, біз пайда табуға тиіспіз, үшінші қағида, біз өз ісімізді сүюге тиіспіз, әйтпесе, ештеңе шықпайды. Бұл менің табыс кілтім. Құрған тобым да осы ұстанымдар бойынша құрылады, олар мұнда айлық жалақы үшін ғана отырған жоқ, олар өз істерін сүйетін жандар, тіпті мен іссапарға кетіп қалсам да, олар жұмыс ғимаратына бәрінен бұрын келіп, бәрінен кеш кетеді.

Мен тобымды ұлғайтуға мүмкіндік беретін істерге құлшына кірісіп кетемін, тобымдағы адамдарды ынталандыра түсуге тырысып жүремін, өйткені олар кейін өз білгенін өзгелерге үйретеді ғой. Бұл жаңа толқын, олар бизнеске басқаша қарайтын болады. Бизнеске келгеніме көп болғандықтан, өзіміз бірге жұмыс істейтін адамдарды жылдам іріктеп аламын. Маған форумда сөз сөйлеңіз деген өтінішпен көптеген спикерлер хат жазып жатады, бірақ көбісінен бас тартамын, мен үшін ең бастысы – спикердің делегаттарға бере алатын құнды білімі.

- Сіздердің форумдарыңызға Ричард Брэнсонды алып келуге бола ма?

Әлбетте, болады. Біз қазірше кәсіпкерлеріміздің қаншалықты қызығушылық танытатынын, олардың неге мұқтаж екенін екенін анықтап алсақ дейміз.

Узнавайте больше об интересных событиях в Казахстане и за рубежом.
Подписывайтесь на нас в Instagram

Заметили опечатку? Выделите ее мышью и нажмите сочетание клавиш Ctrl+Enter.

Асель Сыдыкова

22.09.2015 • 13:13 2204

Поделиться
Новости партнёров
Loading...
  • Центр деловой информации Kapital.kz — информационное агентство, информирующее о событиях в экономике, бизнесе и финансах в Казахстане и за рубежом. При работе с материалами Центра деловой информации Kapital.kz разрешено использование лишь 30% текста с обязательной гиперссылкой на источник. При использовании полного материала необходимо разрешение редакции. Редакция Kapital.kz не всегда разделяет мнения авторов статей. При нарушении условий размещения материалов редакция делового портала имеет право на решение спорных моментов в законодательном порядке.

  • Яндекс.Метрика
    Система Orphus