Қазақстанда егін егу науқанына 402 мың тонна жанар-жағармай бөлінді

Өңірлердегі тыңайтқышпен қамтамасыз ету мәселесі үкіметтегі көктемгі дала жұмыстарына арналған жедел штаб отырысында талқыланды. Отырысты премьер-министрдің орынбасары – ұлттық экономика министрі Серік Жұманғарин өткізді, деп хабарлайды Kapital.kz іскерлік ақпарат орталығы ауыл шаруашылығы министрлігінің баспасөз қызметіне сілтеме жасап.

Ауыл шаруашылығы министрлігінің дерегінше, 2026 жылы ел көлемінде 2,3 млн тонна тыңайтқыш қолдану жоспарланған – бұл өткен жылмен салыстырғанда 500 мың тоннаға көп. Дегенмен келісім-шарт жасау және жеткізу жұмыстары жеткіліксіз қарқында жүргізілуде.

Әкімдіктердің жедел ақпараттарына сәйкес, қазірге дейін 414 мың тонна тыңайтқыш жеткізуге келісім-шарт жасалған, оның 187 мың тоннасы жөнелтілген. Көктемгі науқан басталған оңтүстік өңірлерге тек 30 мың тонна жеткізілген.

Барлық өңірлер тыңайтқыш өндірушілерге қаражатты уақытында аударуға кіріспегені атап өтілді. Вице-премьер артта қалған облыстардың дерегін тыңдап, аграрлық секторға қажетті көлемдегі тыңайтқышты белгіленген мерзімде жеткізу үшін төлемдер мен жеткізуді жеделдетуді тапсырды.

Сонымен қатар, ауыл шаруашылығы өнімін өндірушілерді жеңілдетілген дизель отынымен қамтамасыз ету мәселесі жеке қаралды. Көктемгі егіс науқаны үшін литрі 281 теңгеден 402 мың тонна жанар-жағармай бөлінген, Өткен жылы жеңілдетілген баға 254 теңге болған. Бүгінгі таңда фермерлер үшін дизель отынының бағасы нарық бағасынан 15% төмен.

Диқандардың өтініші бойынша, көктемгі дала жұмыстарына арналған арзандатылған дизель отынын күзден бастап алдын ала бөлу мүмкіндігі, сонымен қатар жеңілдетілген қаржыландыру қамтамасыз ету мәселесі талқыланды. Вице-премьер бұл мәселені энергетика министрлігі мен ауыл шаруашылығы министрлігі бірлесе шешуді тапсырды.

Бұған дейін хабарланғандай, егін науқанына ерте қаржыландыруға 1870 диқан қол жеткізген. Қазіргі таңда 2429 ауыл шаруашылығы тауар өндірушісінен тұратын пул қалыптастырылған.