Астанада еліміздегі ең ірі ойын-сауық паркі салынады

2025 жылдың қыркүйегінде Астанада еліміздегі ең ірі жабық ойын-сауық орталығының құрылысы басталады. Ел аумағында теңдесі жоқ бұл бірегей парк 2026 жылдың көктемінде алғашқы келішілерді қабылдай бастамақ. Аталған ауқымды жоба жайлы Ailand отбасылық демалыс орталығының директоры Арман Маханов әңгімеледі.

– Арман Шихабадинұлы, жаңа ойын-сауық паркі салынатыны туралы жаңалық шықты. Парктің қай жерде орналасатыны туралы айтып өтсеңіз.

– Парк елордалық Ailand отбасылық демалыс орталығының аумағында ашылады. Бұл қайта құрылған ең ірі жоба болғалы отыр. 2025 жылдың 1 қыркүйегінен бастап аквапарк жұмысын тоқтатып, оның орнына жаңа буынға арналған бірегей жабық ойын-сауық орталығы салынады. Мұндай нысан Қазақстанда ғана емес, бүкіл Орталық Азияда да болған емес.

– Нысанның ерекшелігі неде?

– Бұл көлемі мен қызмет ауқымы жағынан Қазақстан бойынша алғашқы ірі кешен болады. Яғни, жыл он екі ай бойы жұмыс істейтін, отбасылық демалысқа арналған орталық болмақ. 10 мың шаршы метр аумақта 100-ден астам аттракцион, оның ішінде ең биік сырғанақтар да орналасады. Жоба әр жастағы келушілерге: бүлдіршіндерге де, жасөспірімдерге де, олардың ата-аналары мен егде жастағы кіілерге де барынша жайлы жағдай, қолайлы кеңістік жасауға бағытталған.  

Кешеннің орталық аймағы реконструкцияның негізгі нүктесі болмақ, онда ғарыш станциясы пішіндес 28 метрлік айрықша мұнара бой көтереді. Ол жаңа буынды Ailand-тың жүрегі тәрізді болмақ. Оның айналасында елде бұрын-соңды болмаған аттракциондар, соның ішінде мұнараның ішінен «өсіп шыққандай» әсер қалдыратын экстремалды сырғанақтар орнатылады. Бұл архитектуралық шешім тұтас әрі көркем көрініс қалыптастырады.

Кешеннің тағы бір ерекшелігі – түрлі іс-шара өткізуге арналған көпфункциялы аймақтың болуы. Яғни, орталықтың бұл бөлігін балалар мерекелерінен бастап, ұжымдық және тақырыптық кездесулерге дейінгі әртүрлі форматта бейімдеуге болады. Кеңістік түр-сипаты мен көлемі жағынан кез келген бағдарламаны ұйымдастыру үшін барлық қажетті нәрселермен жабдықталады. Фудкорт аймағы отбасылық тамақтануға лайықталып, кафелер мен мейрамханалар орналасатын болады. Ailand командасы Food & Beverage саласындағы халықаралық және жергілікті брендтермен ынтымақтасуға дайын.

– Жоба бизнес серіктестер үшін несімен тартымды болмақ?

– Болашақ серіктестерге толассыз келушілер ағыны бар, ыңғайлы жерде орналасқан әрі мақсатты аудиторияға тікелей қолжетімді болатын алаң ұсынамыз. Жаңа кешеннің Астананың оң және сол жағалауы арасында қолайлы жерде орналасуы, отбасылық қызмет көрсетудің дамыған инфрақұрылымы, брендтің танымалдығы және тұрақты келушілер легі, бәрі де бизнес үшін зор артықшылық болмақ. Сонымен қатар брендке іс-шараларға қатысу, өз кеңістігін безендіре алу, арнайы жобаларға бірігу мүмкіндігін ұсынамыз және күндізгі уақытта нақты әрі мақсаттты аудиторияның тұрақты ағыны болады.

– Ailand нарықта 20 жылдан аса жұмыс істеп келеді, сіздердің ең танымал жобаларыңыздың бірі – океанариум. Дегенмен басқа бағыттарыңыз туралы, жаңа парктің қазіргі құрылыммен интеграциясы жайлы да айтып берсеңіз.

– Иә, жоба 2003 жылдан бері жұмыс істеп келе жатқан Ailand отбасылық демалыс орталығының құрамында жүзеге асады. 22 жыл ішінде бұл кешен еліміздегі ең ірі отбасылық ойын-сауық кластеріне айналды және ол жеті бағыт бойынша қызмет көрсетеді. 300-ден астам қызметкеріміз бар, орталықтың жалпы аумағы – 30 000 м². Сондай-ақ жыл сайын Ailand жобаларына 1,5 млн-нан аса адам келеді. Командамыз осы жылдар ішінде өсіп келе жатқан аудитория сұранысына сай үнемі жаңа форматтар енгізіп келеді. Жаңа ойын-сауық орталығын жай ғана реконструкция емес, дамудың логикалық жалғасы десе де болады.

Біздің ең ерекше жобаларымыздың бірі – «Джунгли» аниматроникс театры. Бұл – Қазақстандағы бағзы заманғы дәуір атмосферасын сезіндіре алатын, динозаврлардың, ежелгі тайпалар мен ертегі кейіпкерлерінің шынайы қозғалатын бейнелерімен безендірілген жалғыз театр. Гидтер бастап жүретін экскурсиялар театрландырылған қойылым элементтерімен өтіп, әрбір келушіге нағыз шытырман оқиға сезімін сыйлайды.

Тағы бір мақтан тұтатын жобамыз – сіз жоғарыда атап өткен океанариум. Ол әлемдегі мұхиттан ең алыс, яғни табиғи мекенінен 3 мың шақырым қашықта орналасқан океанариум ретінде Гиннестің рекордтар кітабына енген. Мұнда ондаған түрлі акула мен 2000-нан аса теңіз және тұщы су жәндіктері бар.

Сонымен қатар «Aiduman» балалар театры жұмыс істейді – бұл балаларға арналған интерактивті сахна, танымдық қойылымдар мен анимациялық бағдарламалар алаңы. Жазғы аттракциондар паркінде тақырыптық фестивальдер мен кешкі концерттер өтеді. Астанадағы жалғыз су аттракционы да осында орналасқан.

Ailand аумағында Орталық Азиядағы ең биік шолу дөңгелегі бар. Оның 65 метрлік биігінен елорданың панорамалық көрінісін тамашалауға болады.

Сондай-ақ Астана тұрғындары мен қонақтары экзотикалық жануарлардың ең ірі қалалық зообағы – Экзотариумге бара алады. Мұнда сирек кездесетін альбинос питон, игрунка маймылы, мадагаскарлық тарақандар мен басқа да жан-жануарлар мекендейді.

– Жаңа парк қашан ашылады?

– Жаңа аттракциондар паркі 2026 жылдың көктемінде ашылады деп жоспарланып отыр. Бұл жоба орталығымыздың дамуы жолындағы маңызды белес болады және отбасылық демалысты мүлдем жаңа деңгейге көтереді. Біз жылдың кез келген мезгілінде келуге болатын, балаларға қызықты әрі қауіпсіз, ал ересектерге жайлы да тартымды кеңістік құруды қолға алып жатырмыз. Мұнда технология, мәдениет пен қуанышты эмоциялар толқыны тоғысып, шынайы әсер сыйлайтыны анық. Жаңа орталық барлық отбасының сүйікті мекеніне айналып қана қоймай, Астананың жарқын нышандарының біріне айналады деп сенеміз.