Бірыңғай QR-ды 2026 жылдың наурыз айының соңына дейін барлық банк клиенттері қолдана алады
Бинур Жаленов бұл сервисті іске қосу мерзімі екінші деңгейлі банктерге) байланысты екенін нақтылады
Қазақстанның барлық банктерімен бірыңғай QR-ды іске қосу бойынша келісімшарттарға қол қойылды. Жоспар бойынша, 2026 жылдың бірінші тоқсанының соңына дейін барлық банктердің клиенттері бұл сервисті толыққанды пайдалана алады. Бұл туралы XIII Қаржыгерлер конгресінің кулуарында Цифрлық трансформация жетекшісі, Ұлттық банк төрағасының кеңесшісі Бинур Жаленов хабарлады, деп мәлімдейді Kapital.kz іскерлік ақпарат орталығының тілшісі.
«Бүгінгі таңда тоғыз банк телефон нөмірі арқылы аударымдар жүйесіне және жеті банк банкаралық QR-төлемдер – бірыңғай QR-ға қосылған. Жақын арада барлық банктер бірыңғай QR-ға қосылады. Барлық банктермен келісімшарттарға қол қойылды. 2026 жылдың бірінші тоқсанының соңына дейін барлық банк клиенттері осы сервисті толыққанды пайдалана алады деп ойлаймын. Нақты әр банктің бірыңғай QR-ды қашан іске қосатыны туралы мәліметтерді банктердің өздерінен сұраған дұрыс, себебі жұмыс негізінен олардың тарапында жүргізіледі», - деді Бинур Жаленов конгресс кулуарында.
Ол жақын арада тағы үш банктің бірыңғай QR-ға қосылатынын нақтылады.
«Соның бірі – ForteBank», - деді Бинур Жаленов.
Айта кету керек, банкаралық QR жобасы 2025 жылдың қыркүйегінен бастап пилоттық кезеңде тұр және оған бірінші болып қосылғандар қатарында – Банк ЦентрКредит, Freedom Bank, Home Credit Bank, сондай-ақ Halyk Bank, Bank RBK, Altyn Bank және Kaspi.kz бар.
2025 жылдың 11 қарашасында Нұрбанк басшысы Гүлнара Мусатаева банктің Kaspi QR-ды енгізіп жатқанын хабарлады.
«Бұл опцияны 2025 жылдың қараша айының соңында, ең кеш дегенде биылғы желтоқсан айында іске қосамыз. Бізде интеграция бар, QR-ды тестілеу жүріп жатыр. Белгілі бір кемшіліктер де бар, бірақ олар жойылады деп ойлаймын. Біз өзіміздің QR-ымызбен де жұмыс істеп жатырмыз, бірақ әзірге бірыңғай алгоритмді анықтай алмаймыз», - деп атап өтті банкир. Ол Kaspi QR банктің пайдалануына «өтеусіз» берілгенін нақтылады.
Еске салсақ, 2025 жылдың қыркүйек айының соңында Ұлттық банк кез келген банктің мобильді қосымшасы арқылы тауарлар мен қызметтерге ақы төлеуге мүмкіндік беретін банкаралық QR-төлемдер сервисін іске қосты. Ол кезде бірыңғай QR-ға Банк ЦентрКредит, Home Credit Bank және Freedom Bank қосылған болатын.