AI-аналитик Ұлттық Банкке базалық мөлшерлеме бойынша шешім қабылдауға көмектеседі

Қазақстанның Ұлттық Банкінде цифрлық қаржы сарапшысы пайда болады. Корпоративтік ЖИ Ақша-кредит саясаты комитетінің (АКСК) отырыстарында қаралатын мәселелер бойынша өз пікірін ұсынатын болады. Бұл туралы ҚР Ұлттық Банк басшысы Тимур Сүлейменов Central Asia Fintech Summit 2025саммитінде мәлімдеді, деп хабарлайды Kapital.kz іскерлік ақпарат орталығының тілшісі.

«Жасанды интеллект дәуіріндегі қаржы нарығы» сессиясының модераторы Виталий Волянюк «Жасанды интеллект базалық мөлшерлеме бойынша талқылаулар мен шешім қабылдауға қатыса ма?» сұрады.

«Әзірге мұны тек Ұлттық Банктің Ақша-кредит саясаты комитетінің мүшелері ғана жасайды. Жасанды емес, адами үлкен дау-дамайлар. Базалық мөлшерлеме бойынша шешім күрделі, оны адамдар қабылдайды», - деп түсіндірді Тимур Сүлейменов.

Модератор сұхбаттасынан «Ұлттық Банк жасанды интеллектіні Ақша-кредит саясаты комитетінің мүшесі етуді жоспарлап отыр ма?» деп нақтылады.

«Иә, бастапқыда Ұлттық Банкте төрағаның цифрлық орынбасары жұмыс істейді деген шешім болған. Бірақ біз соншалықты алысқа бармауды жөн көрдік, сондықтан бізде комитет шешімдері бойынша өз алдына тәуелсіз пікірін белсенді ұсынатын цифрлық қаржы аналитигі болады. Оған дауыс беру құқығын бергіміз келмейді, себебі көптеген заңнамалық аспектілер бар. Сондықтан біз ЖИ-қаржы аналитигін ешқандай дауыс беру құқығынсыз енгіземіз. Ақша-кредит саясаты комитетінде көптеген аналитиктер бар, олардың әрқайсысы бір-біріне белгілі бір ойды жеткізуге тырысады... Енді бізде белгілі бір мәселелер бойынша деректер жиынтығы болады (ЖИ-көмекшіден – ред.) және біздің корпоративтік ЖИ өз пікірін ұсынатын болады», - деп атап өтті Ұлттық Банк басшысы Тимур Сүлейменов.

Еске сала кетейік, 2025 жылдың қазан айының ортасында «Самұрық-Қазына» ҰӘҚ дауыс беру құқығы бар ЖИ негізіндегі цифрлық директорлар кеңесінің мүшесін енгізді. SKAI мемлекеттік холдингтің директорлар кеңесінің отырысына қатысып үлгерді. «Самұрық-Қазына» деректері бойынша, нейрондық желіге 2008 жылдан бастап Директорлар кеңесі қараған мәселелер бойынша барлық ақпарат жүктелген. Директорлар кеңесінің цифрлық мүшесі оқытудан өтті және өз жұмысында ҚР нормативтік құқықтық актілерін басшылыққа алады.

«Нейрондық желі нақты уақыт режимінде қаржылық, операциялық және нарықтық деректерді өңдеуге, заңдылықтарды анықтауға, тәуекелдер мен салдарын болжауға, сондай-ақ негізделген ұсыныстар қалыптастыруға және күн тәртібіндегі әрбір мәселе бойынша шешім қабылдауға қабілетті. SKAI аналитикасының дәлдігі мен тәуелсіздігі адами фактордың әсерін едәуір төмендетеді және корпоративтік басқарудың ашықтығын арттырады. Барлық деректер «Қазақтелеком»-ның GPU-кластерінде қорғалған ортада сақталады, ол Қазақстанда толығымен оқшауланған», - деген еді қорда.

SKAI қордың корпоративтік басқару сапасын арттыруға көмектеседі деп күтіліп отыр.