Маңғыстау облысы мұнайдан кейінгі кезеңге дайындала бастады
Кендірлі жобасы Жаңаөзен экономикасын қайта форматтаудың негізгі бағытына айналуы мүмкін
Маңғыстау облысының әкімі Нұрлыбек Қилыбай Орталық коммуникациялар қызметінде өткен брифингте журналист сұрағына жауап бере отырып, өңір экономикасының болашағы, мұнай қорының перспективасы және Жаңаөзен қаласын дамыту бағыттары туралы айтты.
Әкімнің айтуынша, Жаңаөзендегі негізгі мұнай өндіруші – «Өзенмұнайгаз» кәсіпорны бойынша қазіргі таңда «ҚазМұнайГаз» басшылығымен кен орнын оңалту бағдарламасы іске асырылып жатыр. Барланған жаңа қорлар бар, алайда олар анағұрлым терең қабаттарда орналасқан. Егер бүгінде мұнай 1,5–2 мың метр тереңдіктен өндірілсе, келешектегі қорлар 5–6 мың метр деңгейінде болуы мүмкін. Осыған байланысты кен орнын қайта игеру жұмыстары жүргізілуде.
«Бірақ мәселе басқада. Жалпы, болашақта мұнай осындай мөлшерде қажет бола ма? Себебі, өздеріңіз түсінесіздер, қазір бәрі жасыл сутегі мен электр қуатына көшіп жатыр. Баяндамамның басында атап өткенімдей, біз қазір экономиканы диверсификациялаумен айналысып жатырмыз, яғни логистика, туризм және ауыл шаруашылығы, нақтырақ айтсақ, балық шаруашылығы бағытын алып жатырмыз. Сондықтан бүгіннен бастап жастарды мұнайшы мамандығына емес, болашақтың мамандықтарына оқытуымыз керек, біз сонымен айналысып та жатырмыз. Осы үрдісті ескере отырып, өңірде экономиканы әртараптандыру бағыты күшейтілді», - деді Нұрлыбек Қилыбай.
Әкімнің мәліметінше, қазіргі уақытта Маңғыстау облысында шамамен 50 мыңға жуық адам мұнай-газ саласында, оның ішінде инвестициялық және мердігер ұйымдарда жұмыс істеп жүр. Мұнай өндіру жақын жылдары тоқтамайды, алайда 10-15 жылдық перспективада бұл мәселе күн тәртібіне шығуы мүмкін. Осы себепті аймақ билігі бүгіннен бастап баламалы экономикалық тіректерді қалыптастыруға кіріскенін атап өтті.
Сонымен қатар өңір басшысы Жаңаөзен қаласының болашағы Кендірлі курорттық аймағын дамытумен тығыз байланысты болады деп есептейді.
«Егер нақты Жаңаөзен туралы айтсақ, бізге Кендірліні дамыту керек болады. Бүгінде әуежай салынуда. Қазір біз Кендірлі бойынша мастер-план дайындап жатырмыз. Оған тек қазақстандық компаниялар ғана емес, сонымен қатар халықаралық компаниялар, Еуропа, Азербайжаннан халықаралық серіктестер тартылып жатыр», - деп қосты ол.
Алдағы уақытта барлық тараптардың қатысуымен жұмыстарды үйлестіру жоспарланып отыр. Сонымен қатар Жаңаөзен мен Кендірлі арасындағы көлік қолжетімділігін арттыру мәселесі де қарастырылып жатқаны айтылды. Қаладан Кендірліге дейінгі қашықтықтың едәуір болуы туристік ағынды дамыту үшін қосымша инфрақұрылымдық шешімдерді талап етеді.