Маңғыстау облысында шұбат өндіретін жаңа цех іске қосылды
Кәсіпорын түйе сүтін өңдеудің толық циклын атқарады
Маңғыстау облысындағы «Қарағантүбек» серіктестігі түйе сауу және оны өңдеу цехын іске қосты. Жобаның жалпы құны – 600 млн теңгені құрайды.
Кәсіпорынның өндірістік қуаты тәулігіне 400 тонна түйе сүтін өңдеуге мүмкіндік береді. Жаңа нысанның басты артықшылығы – сауу процесі толықтай автоматтандырылған. Бұл өнім сапасы мен гигиеналық талаптардың жоғары деңгейде сақталуын қамтамасыз етеді. Қондырғылар Германиядан әкелінген және заманауи халықаралық азық-түлік өнеркәсібі стандарттарына толық сәйкес келеді.
Жергілікті жердің климаттық ерекшеліктері мен су тапшылығын ескере отырып, кәсіпорын өндіріске қажетті суды дербес жүйе арқылы қамтамасыз етуді ұйғарған. Осы мақсатта 150 метр тереңдікте ұңғыма бұрғыланып, одан алынған су көп сатылы сүзу және тазарту жүйесінен өткізіледі.